Interes-adierazpena, proiektu ekoberritzaileak garatzeko Basque Ecodesign Hub ekimenaren laguntzarekin

Basque Circular Hub prest dago proiektu ekoberritzaileak garatu nahi dituen edozein enpresarekin elkarlanean aritzeko. Proiektuak HUBeko gazteen laguntzarekin eta produktuen eta zerbitzuen ingurumen-berrikuntzaren sektorean esperientzia handia duten espezialisten tutoretzapean egingo dira.

Proiektu horietan hainbat gai landu daitezke; esaterako, ekodiseinua, bizi-zikloaren analisia, ingurumen-aztarnaren kalkulua, dela produktuarena, dela korporazioena, produktuaren ingurumen-adierazpenak, material jasangarriagoen bilaketa, ingurumen-zainketako estrategien plangintza eta garapena, ekoberrikuntzaren trakzioa, eta jasangarritasuna balio-kate guztian, ingurumen-profila optimizatzeko.

Basque Circular HUBekiko lankidetza hori prestakuntza-aldi bat igaro duten gazteen lanaren bidez eramaten da aurrera. Gazteak honako gai hauetan prestatzen dira aldi horretan: produktuen ingurumen-legeria, bizi-zikloaren analisia (BZA), BZAko software-tresnen erabilera, produktuen ekotiketak, marketin ekologikoa, ekodiseinuaren metodologia eta ingurumen-zainketa. Gazte horien ordutegia eta arduraldia aldagarria eta malgua da; beraz, enpresaren beharretara egokitu daitezke. Hauxe da lan-eskema: enpresek gazte horien beka ordaintzen dute, eta Eusko Jaurlaritzak prestakuntza eta tutoretza teknikoko zerbitzu bat ordaintzen du beren eguneroko lanean laguntzeko.

EAEko industria-ehunari zerbitzu eraginkorragoa eskaintze aldera, mota horretako proiekturen bat garatzeko interesa duten enpresak animatzen ditugu konpromisorik gabe gurekin harremanetan jartzera edo informazio gehiago eskatzera. Interes-adierazpenak kontuan hartuta, ikastaroetarako eta praktiketarako programak antolatu ahal izango dira EAEko industria-ehunaren beharrei erantzuteko.

Interes-adierazpena aurkezten duten enpresek Ihoberi baimena emango diote beraiekin kontaktuan jartzeko, Basque Circular Hub ekimenaren barruan antolatuko diren ikastaro eta praktikei buruz informatu ahal izateko.

Interes-adierazpena formulario honen bidez egin behar da, eta datu hauek jarri behar dira: